Kryeministri i Kosovës, Ramush Haradinaj, ka pritur sot në takim deputetin e Parlamentit të Britanisë së Madhe, Martin Vickers, i cili po qëndron në Kosovë në kuadër të aktiviteteve për shënimin e 10-vjetorit të Pavarësisë së Kosovës, transmeton Ekonomia Online.

Në një komunikatë nga Qeveria bëhet e ditur se kryeministri Haradinaj e njoftoi deputetin britanik për zhvillimet e arritura gjatë kësaj dekade, derisa ka kujtuar edhe rolin vendimtar që Britania e Madhe ka luajtur në jetësimin e ëndrrës së kosovarëve, që ishte pavarësia e Kosovës, e që sot po shënon 10-vjetorin e saj.

“Faleminderit miku ynë, faleminderit nga secili qytetarë i Kosovës për ndihmën e pakursyer për ne”, tha kryeministri Haradinaj.

Deputeti i Parlamentit të Britanisë së Madhe, Martin Vickers, përgëzoi kryeministrin Haradinaj dhe gjithë popullin e Kosovës për 10-vjetorin e pavarësisë, duke shprehur ofrimin e mbështetjes së mëtutjeshme të shtetit të tij për rrugën zhvillimore dhe euroatlantike të Kosovës.