Komiteti i Parlamentit Europian për Liritë Civile, Drejtësinë dhe Çështjet e Brendshme (LIBE) dje ka votuar pro marrëveshjes për liberalizimin e vizave për Kosovën.

48 eurodeputetë votuan pro, 7 kundër dhe 3 abstenuan.

Në faqen zyrtare të Parlamentit Evropian tashmë janë publikuar edhe votat e deputetëve.

Por, kush janë shtatë eurodeputetët që s’ishin pro liberalizimit të vizave për Kosovën?

Eurodeputeti Jorge Buxadé Villalba nga grupi parlamentar ECR – Konservatorët dhe Reformistët Europianë, i cili është një grup politik euroskeptik i butë, anti-federalist i Parlamentit Europian. Villalba është avokat dhe politikan spanjoll, i cili u zgjodh anëtar i PE-së në zgjedhjet e Parlamentit Europian 2019 në Spanjë.

Eurodeputeti Gunnar Beck nga grupi parlamentar Identitet dhe Demokraci, i cili është një grup politik i krahut të djathtë në PE, i formuar më 2109. Ai përbëhet nga parti kombëtare nacionaliste, populiste të krahut të djathtë dhe euroskeptikë nga dhjetë vende europiane. Beck është politikan, akademik dhe avokat gjerman.

Eurodeputeti Tom Vandendriessche është nga grupi i njëjtë parlamentar sikurse Beck. Ai është politikan dhe biznesmen belg.

Eurodeputeti Milan Uhrík është nga grupi parlamentar NI, një shkurtesë për Non-Inscrits, që nuk i përkasin grupeve politike të njohura. Uhrik është politikan sllovak i cili u zgjodh si deputet i Parlamentit Europian në vitin 2019.

Eurodeputetja Isabel Benjumea Benjumea nga grupi parlamentar EPP. Grupi i Partisë Popullore Europiane është grup politik i qendrës së djathtë të PE-së i përbërë nga deputetë nga partitë anëtare të Partisë Popullore Europiane (EPP). Benjumea është politikane spanjolle që shërben si deputete në PE që nga viti 2019.

Eurodeputetja Nadine Morano  është po ashtu nga grupi parlamentar EPP. Ajo është politikane franceze e republikanëve, e cila shërben në PE që nga viti 2014. Më parë ka qenë edhe ministre në Francë.

Eurodeputeti Maite Pagazaurtundúa nga grupi parlamentar Reneë, i cili është një grup politik liberal, pro-europian i Parlamentit Europian i themeluar për mandatin e nëntë të PE-së.

Ndërkaq, dy eurodeputetët që abstenuan janë: eurodeputetja sllovake Lucia Ďuriš Nicholsonová, si dhe eurodeputetët spanjollë Domènec Ruiz Devesa dhe Javier Moreno Sánchez.

Tashmë dosja për liberalizimin e vizave të Kosovës do të shkojë për t’u votuar në Parlamentin Europian.

Ky institucion dje në një përgjigje për Gazetën Express ka treguar datat se kur mund të ndodhë ky votim.

“Tash dosja do të shkojë në seancë plenare dhe vlerësimi aktual është se ajo do të jetë në seancën e dytë plenare të marsit ose të parën e prillit”.

Në faqen zyrtare të PE-së, seanca e dytë plenare planifikohet të mbahet më 29 dhe 30 mars, ndërsa ajo e prillit do të mbahet më 17 deri më 20.