Ministri i Jashtëm i Sllovakisë, Miroslav Lajçak ka deklaruar se pas skadimit të mandatit të tij, ai do të punojë në Bruksel për Bashkimin Evropian.
Ai nuk i ka komentuar spekulimet se do të jetë i dërguar i veçantë i BE-së për dialogun Prishtinë-Beograd.
Në bisedën për televizionin sllovak “Tablet”, ai ka thënë se i ka pranuar disa oferta interesante për punë.
“Tani për tani, duket kështu: Njëjtë si kur u ktheva më 2012 nga Brukseli në Sllovaki, ashtu edhe tani, tetë vjet më vonë, do të kthehem në Bruksel, në BE”, ka thënë Lajçak, raporton agjencia sllovake e lajmeve, TASR.
TASR përkujton se gjatë fillimit të shkurtit emri i Lajçakut është përmendur në lidhje me emërimin e një të dërguari të BE-së për dialogun Beograd dhe Prishtinë.
Përfaqësuesi i posaçëm i BE-së për Politikë të Jashtme dhe Siguri, Joseph Borrell kishte propozuar emërimin e një të dërguari për Ballkanin Perëndimor, derisa zëdhënësi i tij, nuk ka dashur ta komentojë emërimin e mundshëm të Lajçakut.