Autoritetet kompetente kanë hequr rrënojat dhe përfunduan kërkimet për viktimat në vendin ku u shemb një ndërtesë shumëkatëshe në Stamboll të mërkurën.

Në ndërtesën e cila papritmas u shemb për vetëm pak sekonda në orët e pasdites humbën jetën 21 persona dhe 14 të tjerë u plagosën.

Vendin e fatkeqësisë sot e vizituan edhe ministri turk i Mjedisit dhe Urbanizmit, Murat Kurum, guvernatori i Stambollit Ali Yerlikaya dhe prokurori hetues i rastit, raporton AA, përcjell Klan Kosova.

Autoritetet njoftuan vazhdimin e hetimit ndërkaq në periudhën e ardhshme do të rrënohet edhe ndërtesa fqinje për të cilën u konstatua se paraqet rrezik për dëmet që ka pësuar gjatë shembjes.

Ministri Kurum sot do të marrë pjesë në varrimin e viktimave të shembjes së ndërtesës ndërsa pasdite do të takohet me banorët lokalë të lagjes Kartal.