Liverpooli ka zbuluar një memorial të përhershëm në nderim të Diogo Jotës dhe vëllait të tij, Andre Silva, në “Anfield”, në prag të përvjetorit të parë të vdekjes së tyre tragjike.

Memoriali me titullin “Forever 20” është vendosur në “97 Avenue”, pikërisht aty ku tifozët u mblodhën pas tragjedisë për të lënë lule, shalla dhe mesazhe prekëse në kujtim të dy vëllezërve. Tashmë, ai vend do të shërbejë si një hapësirë e përhershme kujtimi për tifozët dhe familjen e tyre.

Klubi anglez ka krijuar këtë homazh pranë tribunës kryesore të stadiumit, duke zgjedhur një lokacion me domethënie të veçantë. Pas vdekjes së Jotës dhe Silvës, mijëra tifozë u mblodhën aty për të shprehur dhimbjen dhe respektin e tyre.

We have installed a permanent memorial at Anfield in tribute to Diogo Jota and his brother André Silva, on the eve of the first anniversary of their tragic passing ❤️

— Liverpool FC (@LFC) July 2, 2026

Memoriali është dizajnuar nga skulptorja Emma Rodgers dhe përmban një zemër në lëvizje, të frymëzuar nga festimi karakteristik i golave të Diogo Jotës. I parë nga kënde të ndryshme, ai zbulon numrat 20 dhe 30, ndërsa përfshin edhe vargje nga kënga që “Kop”-i e këndonte rregullisht në nderim të sulmuesit portugez.

Zbulimi i memorialit vjen në ditën kur Liverpooli shënon përvjetorin e parë të aksidentit rrugor në Spanjë, ku humbën jetën Jota dhe vëllai i tij, Andre Silva. Klubi ka bërë të ditur se memoriali do të qëndrojë si një simbol i përhershëm dashurie, bashkimi dhe kujtese, duke u ofruar tifozëve një vend ku mund të ndalen, të reflektojnë dhe të bëjnë nderimet e tyre.

“Liverpool FC ndalet sot në kujtim të Diogo Jotës dhe Andre Silvës”, thuhet në deklaratën zyrtare të klubit. “3 korriku shënon përvjetorin e parë të aksidentit tragjik rrugor në Spanjë, ku sulmuesi i Reds dhe vëllai i tij humbën jetën.

“Një memorial i ri dhe prekës në nderim të dy vëllezërve është zbuluar në ‘97 Avenue’, jashtë stadiumit, duke krijuar një hapësirë të përhershme për kujtim dhe reflektim.

“Fanella me numrin 20, të cilën Diogo i dashur e veshi me krenari për Liverpoolin, u tërhoq menjëherë nga klubi në të gjitha ekipet e tij. Ai do të jetë përgjithmonë numri ynë 20, djali ynë nga Portugalia.”

Memoriali përfshin edhe disa detaje personale që nderojnë jetën e dy vëllezërve. Disa nga sendet e lëna nga tifozët pas tragjedisë janë ruajtur në dyll dhe janë vendosur brenda strukturës, ndërsa bazamenti prej guri është punuar nga gur portugez i marrë nga qyteti i tyre i lindjes, Gondomar.

Po ashtu, memoriali përmban një lule të derdhur në bronz dhe një kontrollues PlayStation, si shenjë e pasionit të Jotës për lojërat konkurruese dhe esports.

Liverpooli kishte vendosur më herët ta tërhiqte fanellën me numrin 20 në të gjitha ekipet e klubit, si shenjë respekti pas vdekjes së tij.

Memoriali tashmë është i hapur për publikun dhe pritet të vizitohet nga një numër i madh tifozësh gjatë fundjavës së përvjetorit. Ai do të mbetet pjesë e përhershme e peizazhit të “Anfield”, duke u dhënë tifozëve dhe vizitorëve një vend të veçantë për të nderuar Diogo Jotën dhe Andre Silvën për shumë vite me radhë.