Malishevë, shënohet viti i shtatë që nuk ka vdekje nga rriqrat, dezinsektimi po tregohet i suksesshëm

Prishtinë | 26 Maj 2020 | 20:21 | Nga Ekonomia Online

Tani e 7 vite nuk ka pasur raste me fatalitet nga pickimi i rriqrave që shkaktojnë ethe hemorragjike.

Komuna e Malishevës e cila njihet si vatër e kontaminuar me ethe hemorragjike ka të rrezikuar 46 fshatra nga pickimi i rriqrave.

Projekti i Ministrisë së Bujqesisë, Pylltarisë dhe Zhvillimit Rural parasheh për çdo vit të trajtojë 18 deri 20 fshatra apo 4000 hektarë dezinsektim në vendet me prioritet në Komunën e Malishevës.

Në kuadër të projektit për luftimin dhe parandalimin e përhapjes së etheve hemorragjike “Zona Park” po vazhdon të trajtojë këto zona endemike me stafë profesional të përbërë nga gjithsejtë 35 punonjës të pajisur me teknologjinë e fjalës së fundit me të cilat po tregohet rezultat i lartë në lokalizimin dhe mbajtjen në kontroll të etheve hemorragjike.

Për çdo vit në Komunën e Malishevës zbatohet strategjia nacionale për luftimin dhe parandalimin e etheve hemorragjike kime kongo (EHKK), me ç ‘rast bëhet dezinsektimi i zonave endemike. Të gjitha aktivitetet realizohen në bashkërendim mes Komunës së Malishevës dhe Instituti Kombëtar të Shëndetësisë Publike dhe ministrive përgjegjëse.

Dezinsektimi në këto vatra është shumë domethënës për banorët, ngase mundësohet zvogëlimi i mundësive për infektim nga sëmundja e etheve hemorragjike krime kongo, i cili përcillet përmes rriqrave.

Që nga paslufta në Komunën e Malishevës si pasojë e prezencës së rriqrave janë prekur një numër i madh i banorëve, ndërsa deri në vitin 2013 kanë humbur jetën 18 qytetarë.

Prandaj, dezinfektimi në këto zona vazhdon të vlerësohet shumë i rëndësishëm, pasi nga viti 2013 e deri më tani si rezultat i këtij procesi nuk ka pasur asnjë rast të vdekjeve apo raste me infeksion nga EHKK.

Kontribut të madh në këtë drejtim ka dhënë edhe profesionalizmi i lartë i kompanisë për dezinsektim nga Prizreni, “Zona Park”, e cila me ekipet e saj të dezinfektimit kanë parandaluar përhapjen e etheve hemorragjike, duke minimizuar njëkohësisht edhe përhapjen nëpër vatra tjera përreth.


Të ngjashme