Ministri në detyrë i Arsimit, Shkencës dhe Teknologjisë, Shyqri Bytyqi, dhe drejtoresha e Green Art Center – Prishtina (GAC), Merlina Beu – Muçaj, zhvilluan një takim pune, ku krahas tjerash u diskutua për aktivitetet mjedisore në kuadër të programit të GAC për edukim mjedisor në institucionet arsimore.

Ky takim u zhvillua në kuadër angazhimit të vazhdueshëm për pasurimin e programit mësimor ekstra kurikular për nxënësit në Kosovë dhe me qëllim të rritjes së bashkëpunimit dhe bashkërendimit të aktiviteteve të shoqërisë civile me institucionet e vendit.

Njëherazi, në këtë takim u vecua rëndësia e aktiviteteve jashtë mësimore nëpër shkolla, roli i nxënësve dhe studentëve në ngritjen e vetëdijes qytetare në komunitetin e gjerë dhe aktivizmi qytetar.

Kësisoj, Ministri Bytyqi ofroi mbështetjen e tij duke u shprehur që MASHT është e përkushtuar që në vazhdimësi t’i ofrojë mbështetje organizatave të shoqërisë civile me të cilat ndanë qëllimin e përbashkët, ngritjen e kapaciteteve njerëzore dhe edukimin e brezave të rinj me programe dhe aktivitete bashkëkohore me impakt për shoqërinë në Kosovë.

Përmes aktiviteteve të shumta që GAC implementon, synohet sensibilizimi i qytetarëve dhe edukimi i brezave të rinj për rëndësinë e mbrojtjes së mjedisit dhe zbatimin e reformave të ndryshme që kanë nisur nëpër komuna në Kosovë.