Të premten, ka përfunduar afati i aplikimit të qytetarëve për konvertimin e patentë shoferëve nga ata ilegalë në të Republikës së Kosovës.

Këtë e bëri të ditur, për Ekonomia Online, zëvendësdrejtori i Policisë së Kosovës për rajonin e veriut, Veton Elshani, i cili ka deklaruar se i kanë konvertuar 6 mijë e 509 patentë të qytetarëve.

Po ashtu, Elshani ka dhënë detaje për statistikat nëpër komuna. Ai ka thënë se në komunën e Leposaviqit 2 mijë e 18 qytetarë i kanë konvertuar patentë shoferët. Në Mitrovicën e Veriu janë konvertuar 1 mijë e 576 patentë shoferë.

Kurse, në Zubin Potok janë konvertuar 961 patentë shoferë, e në Zveçan patentë shoferin e kanë konvertuar 1 mijë e 177 qytetarë.

Pas përfundimit të këtij procesi, Elshani ka deklaruar se nga dita e hënë do të vazhdohet me gjobitje, të cilat sipas tij do të jenë në vlerë nga 500 deri në 1500 euro.

“Deri sot janë konvertuar 6 mijë e 509 patentë shoferë. Ka afat edhe nesër deri në orën 16:00. Pastaj, është fundjavë dhe do të vazhdojmë me vetëdijësim të qytetarëve, në rast se hasim në patent shofer paralel, e të cilat janë jo ekzistuese për ne. Nga e hëna në ora 8:00 çdo gjë do të funksionojë si në jug. ”, ka thënë ai.