Milani e ka bërë transferimin e parë këtë verë dhe ai është mbrojtësi Mateo Musacchio, të cilin e ka blerë nga Villarreali.

Futbollisti ishte në Milano javën e kaluar për t’i bërë testet mjekësore, ndërsa të martën është konfirmuar se ai ka arritur marrëveshje me Rossonerët.

“Milan bën të ditur se e ka transferuar Mateo Musacchion nga Villarreali me kontratë deri më 30 qershor 2021”, thuhet në njoftimin e klubit.

Në njoftim nuk bëhet i ditur çmimi, por besohet se Milani ka paguar rreth 18 milionë euro për 26-vjeçarin.

Pritet që këto ditë te Rossonerët të transferohet edhe mesfushori i Atalantas, Franck Kessie, i cili tashmë i ka kaluar testet mjekësore.