Shkodran Mustafi është duke kërkuar nga Arsenali shkëputjen e kontratës qysh në afatin kalimtar të janarit.

Mbrojtësi shqiptar është futur në vitin e fundit të kontratës me Topçinjtë, kontratë e cila skadon në verën e këtij viti.

Por mediat angleze kanë raportuar se lojtari me agjentin e tij janë në bisedime me klubin londinez për të gjetur një gjuhë të përbashkët për ta shkëputur kontratën tani.

28-vjeçari duket se ka vendosur të rikthehet në elitën e futbollit gjerman Bundesliga.

Mediat gjermane kanë raportuar se mbrojtësi shqiptar është në bisedime me dy ekipet gjermane, Eintracht Frankfurt dhe Hertha Berlin.

Në rast se do të largohet në janar si i lirë, Mustafi do t’i bashkohet njërës nga këto dy ekipe.

Por nëse Arsenali nuk e lejon largimin e tij, atëherë shqiptari në verë do të largohet si futbollist i lirë.

Gjithnjë sipas medieve gjermane, lojtari preferon vetëm rikthimin në Gjermani afër familjes dhe nuk do t’i shqyrtojë ofertat nga kampionatet tjera vetëm nga Bundesliga.

Kësisoj Hertha Berlin dhe Eintracht Frankfurt mbesin dy ekipet favorite për të nënshkruar me mbrojtësin.