Asociacioni Kosovar i Industrisë Private për Siguri (AKIS), shpreh shqetësimin e saj të thellë mbi ngjarjet e fundit të plaçkitjeve dhe thyerjeve/eksplodimeve në objektet e institucioneve financiare bankare dhe jo bankare, si dhe gjuajtjen me armë zjarri në drejtim të punonjësve të sigurimit dhe zyrtarëve policor.

“Si dukuri shqetësuese, në ngjarjet e fundit, plaçkitësit përveç synimeve për arritjen e qëllimit të tyre të plaçkitjes, kanë gjuajtur me armë zjarri në drejtim të shërbyesve të sigurisë, me ç’rast, është rrezikuar rëndë jeta e punonjësve të sigurimit dhe zyrtarëve policor”, thuhet në reagimin e tyre.

Shoqata AKIS kërkon nga Ministria e Punëve të Brendshme që në bashkëpunim me Policinë e Kosovës dhe Shoqatën e Kompanive të Sigurimit (AKIS), me urgjencë të krijojnë grupe punuese për të punuar mbi masat e nevojshme për parandalimin e ngjarjeve të ngjashme dhe zbardhjen e rasteve të fundit.

Në fund, kjo shoqatë thotë se është e gatshme që të jap kontributin e saj në këtë drejtim, me qëllim të parandalimit të këtyre dukurive dhe krijimin e kushteve të sigurisë.