Jeta dinamike dhe veprimtaria kryesore qytetare që për bazë ka kryeqytetin gjatë viteve të fundit ka rritur edhe numrin e rezidentëve në Prishtinë.

Paralelisht me nevojën e tyre për banim në Prishtinë, është rritur edhe fluksi i ndërtimeve të larta të kryeqytetit derisa shumë lagje janë ngritur nga hiçi.

Në secilën anë Prishtina është e kufizuar me rrethoja, vinça e materiale të ndryshme ndërtimi derisa qyteti përfshihet në atmosferën e zhurmshme të punës.

Plane shumëkatëshe, kushte moderne e hapësirë sa më e madhe përreth është kushti kryesor, derisa nuk mungojnë as planet luksoze me bazë Prishtinën.

Megjithëkëtë, në kohën kur vendi po përballet me pandeminë e me Prishtinën ndër qytetet më të prekura, edhe intensiteti i punës në ndërtim është zvogëluar dukshëm.

Sipas Faton Hoxhës nga Shoqata e Ndërtuesve të Prishtinës, edhe përkundër rrezikut të shtuar nga virusi ata nuk kanë marrë ende asnjë vendim nga Qeveria për ta ndërprerë veprimtarinë e tyre, raporton KOHA.

Bashkë me vazhdimin e punës në ndërtimtari vazhdon edhe rritja e Prishtinës, derisa ka të atillë që e shohin të arsyeshme edhe të mbindërtojnë.

Për këtë fenomen Drejtori i Drejtorisë së Inspekcionit në Prishtinë, Adonis Tahiri thotë se edhe përkundër pandemisë po vazhdojnë inspektimet për parandalimin e ndërtuesve të jashtëligjshëm.

Tahiri tutje shton se gjatë kësaj kohe edhe drejtoria të cilën ai udhëheq është ndikuar nga pandemia duke bërë që të reduktohet numri i stafit.

Por edhe përkundër kësaj drejtori i inspekcionit thotë se po vazhdojnë diskutimet më ndërtuesit për lejet e ndërtimit dhe gjobat për shkelësit.

Përveç paralizimit të punës CO-VID19-shi ka ndikuar edhe në të hyrat e kompanive ndërtuese për çka kryetari i Shoqatës së Ndërtuesve të Prishtinës thotë se do të jetë vështirë menaxhimi pas tejkalimit të situatës.

Derisa vendi vazhdon të përballet me pandeminë Komuna e Prishtinës ka kërkuar mirëkuptimin e bizneseve që operojnë në kryeqytet, ku pas hartimit të planit emergjent të gjitha bizneset e prekura në Prishtinë do të ndihmohen me subvencione.