Në operacionet e ndërmarra njëkohësisht në 37 adresa në Austri janë ndaluar 26 persona, të akuzuar si pjesë e strukturës “shtet paralel”.

Në një deklaratë të publikuar nga Ministria e Brendshme mësohet se afërsisht 500 forca të sigurisë kanë kryer operacione ndaj 37 adresave në 8 rajone.

Në deklaratë theksohet se në mesin e 26 personave të ndaluar ndodhet edhe Monika Unger, liderja e grupit “kundër shtetit” që njihet si “Unioni i vendeve të Austrisë” i cili ka një retorikë të të djathtës ekstreme.

Ndër të tjera theksohet se grupi duke kryer takime në të gjithë vendin është përpjekur të shtojë anëtarët, nuk njeh ligjet dhe shtetin e Austrisë si dhe kërkon të formojë strukturën e “shtetit paralel”.

Gjithashtu bëhet e ditur se grupi i cili aktualisht ka mbi 1.000 anëtarë ka përgatitur dokumente të jashtëligjshme dhe se njerëzit i gënjente me pretendimin se ata që posedonin këto dokumente ishin të përjashtuar nga ligji.

Grupi në fjalë iu ofronte kundrejt pagesës anëtarëve të tij dokumente të falsifikuara, si targa, karta identiteti si dhe sugjeronin për mos pagesën e taksave dhe gjobave shtetit.

Në operacione mësohet se janë konfiskuar një numër i madh dokumentesh të falsifikuara dhe vlerave monetare, ndërsa të dyshuarit pritet të dalin para gjykatësit ditën e premte.