Prokurorët federalë njoftuan të premten se kanë ngritur aktakuzë ndaj senatorit amerikan Robert Menendez, një demokrat nga Nju Xhersi, dhe bashkëshortes së tij, nën dyshimin se kanë pranuar ryshfet në vlerë mijëra dollarë.

Zyra e Prokurorit të Përgjithshëm në Manhatan tha se Menendez dhe gruaja e tij, Nadine, akuzohen se pranuan shufra ari dhe para të gatshme në këmbim që Menendezi ta përdorte pushtetin dhe ndikimin si senator për t’i mbrojtur dhe pasuruar tre biznesmenë të Nju Xhersit.

Kryetari i Komitetit për Marrëdhënie me Jashtë në Dhomën e Përfaqësuesve të Shteteve të Bashkuara, Eliot Engel dhe sekretari amerikan i Shtetit, Mike Pompeo.

Menendez, kryetar i Komitetit me ndikim të Senatit amerikan për Marrëdhënie me Jashtë, në të kaluarën ishte akuzuar në Nju Xhersi për pranimin e fluturimeve private, kontributeve për fushatë dhe llojeve të tjera të ryshfetit nga një patron i pasur në këmbim të favoreve zyrtare, por gjykimi i tij më 2017 mbaroi pasi juria nuk arriti verdikt.

Ai ka qenë pjesë e Senatit që nga viti 2006.

Menendez dhe Nadine Menendez përballen me nga tri vepra penale secili: konspiracion për të pranuar ryshfet, konspiracion për mashtrim dhe konspiracion për zhvatje.

Prokurorët do të kërkojnë që asetet e Menendezit të konfiskohen, përfshirë shtëpia e tij në Nju Xhersi, një veturë Mercedes-Benz e vitit 2019, rreth 566.000 dollarë para të gatshme, shufra ari, si dhe para nga një llogari bankare.