Prokuroria Themelore në Gjakovë, ka ngritur aktakuzë kundër zyrtarit policor me inicialet P.P., për shkak të veprës penale “Ngacmimi”, raporton Gazeta Sinjali.

Sipas aktakuzës, më 13 shtator 2021 e deri më 14 shtator 2021, në Gjakovë, P.P., në vazhdimësi përfshihet në sjellje të padëshirueshme, me qëllim të ngacmimit, duke i sjellë shqetësim emocional të dëmtuarës R.S.

Në aktakuzë thuhet se e dëmtuara kishte shkuar që të denonconte një rast që lidhej me vajzën e saj, por pasi që ka shkuar në shtëpi, zyrtari policor i cili e kishte intervistuar, i kishte dërguar mesazhe provokuese në telefon.

Për më tepër, polici në fjalë akuzohet se në orët e para të mëngjesit kishte shkuar në shtëpinë e të dëmtuarës, por kur e kishte parë brenda edhe motrën e saj, ishte arsyetuar se ka shkuar për të marrë një thikë, gjoja si provë për rastin paraprak që e kishte raportuar ajo.

Prokurori i rastit i ka propozuar Gjykatës kompetente, që i pandehuri të dënohet sipas ligjit për veprën penale e cila i vihet në barrë.