Të martën në Shtetet e Bashkuara ka nisur përzgjedhja e jurisë për gjyqin kundër një zyrtari policor, i cili është akuzuar për vrasjen e një amerikani zezak vitin e kaluar.
Vdekja e George Floydit është incizuar dhe është publikuar nëpër shumë platforma.
Ai ka vdekur pasi është arrestuar në rrugët e Minneapolisit më 25 maj të vitit të kaluar.
Megjithatë, një vendim i apelit mund të ndalë procesin për disa javë, teksa shteti i Minnesotas tenton të shtojë një akuzë shtesë për vrasje kundër 44-vjeçarit Derek Chauvin.
Gjyqi pritet të jetë ndër më të vëzhguarit në vitet e fundit.
Floyd ka vdekur pasi Chauvin e ka shtypur atë me gju në qafë.
Viktima i ka pasur duart e lidhura dhe ka thënë se nuk merr dot frymë.
Vdekja e Floydit ka nxitur protesta të mëdha nga mbështetësit e lëvizjes, Jetët e njerëzve me ngjyrë kanë vlerë, si në SHBA, ashtu edhe në shumë vende tjera të botës.
Chauvin – tani ish-zyrtar policor- përballet me vrasje të shkallës së dytë në një gjykatë në shtetin e Minnesotas.
Mirëpo Gjykata e Apelit në këtë shtet ka urdhëruar gjyqtarin që të rishqyrtojë kërkesën e prokurorëve për të shtuar edhe një akuzë të tretë, vrasje të shkallës së tretë.
Avokati kryesor i Chauvinit ka thënë se do t’i kërkojë Gjykatës Supreme të Minnesotas që të rishikojë vendimin e 5 marsit, proces që mund të marrë javë.
Prokurorët janë duke kërkuar po ashtu nga Gjykata e Apelit që të ndalë gjyqin derisa të merret vendim për akuzën e tretë.
Për shkak të pandemisë së koronavirusit, gjyqtari ka thënë se do të lejojë transmetimin përmes video-lidhjes.
Tre zyrtarë tjerë policorë të përfshirë në arrestimit e Floydit përballen me akuza më të lehta dhe do të gjykohen ndaras.
Të katër zyrtarët policorë kanë qenë pjesë e Departamentit Policor në Minneapolis. \ REL