Zhvillimi i ekonomisë mes Shqipërisë e Kosovës, mbetet si një ndër rrugët për të zhvilluar ekonomitë përkatëse përmes krijimit të tregut të përbashkët Shqipëri-Kosovë. Për investitorët kjo do të përkthehet në më shumë konsumatorë dhe mundësi të shumëfishta për potenciale tregjesh dhe pasuri natyrore. Kjo duhet të ndodhë në kushtet kur rajoni ka nisur garën e ashpër për thithjen e investimeve të huaja.

Ka qenë kryeministri i Shqipërisë, Edi Rama, dhe tash së fundmi kryeministër dhe presidenti i zgjedhur i Serbisë Aleksandar Vuçiq, që janë shprehur për një model të thelluar siç është bashkimi rajonal doganor. Vuçiq përpiqet për lidhje ekonomike e tregtare të ish-shteteve të ish-Jugosllavisë dhe të Shqipërisë, sepse, sipas tij, kjo do të shtonte ekonominë e këtyre shteteve dhe do të përforconte bashkëpunimin rajonal, shkruan sot “Koha Ditore”.

Ndërkohë që nisma e Vuçiqit e përkrahur nga Rama është kundërshtuar nga bizneset kosovare. Megjithatë, shkëmbimet tregtare të Shqipërisë me Kosovën si në krahun e importeve dhe në atë të eksporteve janë në nivele të ulëta.

Ndërkohë që investimet private si ato të Shqipërisë në Kosovë e anasjelltas mbeten gjithashtu në nivele anemike. Tregu i Kosovës vazhdon të mbizotërohet kryesisht me mallrat serbe, ndërsa biznesmenët nga Shqipëria dëshirojnë të bëjnë tregti dhe të kenë marrëdhënie ekonomike kryesisht me Italinë dhe Greqinë