Balkan Green Foundation (BGF), Instituti GAP, Grupi për Studime Juridike dhe Politike (GLPS) dhe Instituti për Politika Zhvillimore (INDEP) kanë ngritur shqetësimet e tyre të vazhdueshme mbi kontratën miliardëshe të Termocentralit Kosova e Re e cila veçse po jetësohet me ndihmën e kompanisë publike NKEC.

Qeveria e Kosovës ka themeluar kompaninë publike NKEC (Ndërmarrja e Re Energjetike e Kosovës) e cila do të shërbejë si ndërmjetësuese në mes të ContourGlobal (investitorit privat) dhe tregut të energjisë në Kosovë. TC Kosova e Re ka një çmim të garantuar prej 80 euro/MWh dhe NKEC detyrohet të blejë 100 përqind të kapacitetit të TC Kosova e Re i cili pritet të prodhojë afërsisht 3,370,000 MWh në vit edhe nëse tregu nuk e kërkon.

Kur i shumëzojmë 3,370,000 MWh në vit me çmimin e garantuar prej 80 euro/MWh del që qytetarët e Kosovës do të duhet t’ia paguajnë ContourGlobal 270 milionë euro në vit apo 5.4 miliardë euro për 20 vitet e ardhshme pas ndërtimit të termocentralit. Financimi i ndërtimit të termocentralit parashihet të bëhet me një strukturë financiare ku 70 përqind e kostos pritet të mbulohet nga financimi përmes kredisë dhe 30 përqind nga investimi përmes kompanisë private ContourGlobal. Me një strukturë të tillë të financimit, 910 milionë euro do të financohen përmes kredisë si dhe 390 milionë do të financohen përmes investimit privat. ContourGlobal parashihet që vetëm brenda një viti t’i arkëtojë 270 milionë euro apo 69 përqind të investimit të tyre privat.

Balkan Green Foundation (BGF) dhe Instituti për Politika Zhvillimore (INDEP) kërkojnë tërheqjen e menjëhershme nga kontrata për ndërtimin e këtij termocentrali. Ky projekt do të falimentojë Kosovën ekonomikisht, do të pamundësojë liberalizimin dhe integrimin e tregut të energjisë elektrike, si dhe paraqet një goditje vendimtare të mjedisit, shëndetit dhe të drejtave të njeriut. Duke ndërprerë këtë projekt të dëmshëm, Kosova ka mundësinë të ndërtojë të ardhme evropiane përmes tranzicionit të energjisë drejt burimeve të ripërtërishme, efiçiencës së energjisë dhe një tregu të integruar e liberal në funksion të përballueshmërisë së çmimeve dhe mbrojtjes së konsumatorit.