Novavax ka bërë të ditur se ka bërë kërkesë zyrtare në Administratën e Ushqimit dhe Barërave (FDA) që t’i autorizohet vaksina e saj kundër koronavirusit, për përdorim urgjent në SHBA.

Kërkesa është bërë bazuar në rezultatet e dy testeve të mëdha klinike, që kanë dëshmuar një efikasitet prej rreth 90% të vaksinës, ka bërë të ditur kompania.

“Ne besojmë se vaksina jonë ofron një opsion të diferencuar, të ndërtuar mbi një platformë vaksine me bazë proteinash që mund të jetë një alternativë ndaj portofolit të vaksinave të disponueshme, për të ndihmuar në luftimin e pandemisë COVID-19”, ka thënë Stanley Erck, presidenti dhe shefi ekzekutiv i Novavax.

Novavax ka njoftuar në qershor të vitit të kaluar se vaksina e saj ka shfaqur efikasitet prej 90,4% në fazën e 3-të të testimeve të kryera në SHBA dhe Meksikë. Testimi është bërë pak kohë para se varianti Omicron të bëhej dominant në SHBA.

Në dhjetor, kompania tha se kishte përfunduar paketën e saj përfundimtare të dorëzimit në FDA për autorizimin e përdorimit urgjent të vaksinës, të quajtur NVX-CoV2373.

Sipas kompanisë, vaksina mund të ruhet në temperatura normale në frigorifer, midis 2 dhe 8 gradë Celsius, dhe ka një jetëgjatësi prej rreth nëntë muajsh.

Vaksina e Novavax – e administruar në dy doza, tre javë larg njëra-tjetrës, është bërë duke përdorur copa të vogla, të ndërtuara në laborator të koronavirusit për të stimuluar imunitetin, një qasje më tradicionale për zhvillimin e vaksinës me të cilën disa njerëz mund të jenë më të njohur ose të rehatshëm, krahasuar me vaksinat mRNA të bëra nga Moderna dhe Pfizer/BioNTech.