Oda e Afarizmit të Kosovës kërkon nga Ministri i Tregtisë dhe Industrisë, Endrit Shala dhe ai i Financave, Bedri Hamza që të lirojnë lëndën e parë për prodhuesit vendor ashtu siç është e paraparë me Ligj.

Arsyeja e kërkesës është ankesa e prodhuesve lidhur me lirimin nga TVSH-ja e lëndës së parë.

“Çdo fillim të vitit, prodhuesit vendor obligohen të aplikojnë në ATK për lirim nga TVSH-ja për lëndën e parë të importuar, ndërsa pas aprovimit të saj fillon edhe zbatimi në Dogana. Vitet paraprake shqyrtimi i kërkesave është bërë për një periudhë më të shkurtë kohore, gjë që nuk i ka penguar bizneset në vazhdim të prodhimit”.

“Këtë vit bizneset po përballen me probleme pasiqë për shkak të mos shqyrtimit të këtyre kërkesave lënda e parë ka mbetur pa kaluar në Doganë dhe si pasojë bizneset po detyrohen të paguajnë për qëndrimin e kamionëve dhe frigoriferëve në terminale dhe po krijonë edhe pengesa në prodhim”.

Oda e Afarizmit të Kosovës kërkon që të merren masat e nevojshme për këtë problem.

OAk njëherit kërkon që të përkrahen prodhuesit vendor, duke ju lejuar që të bëjnë futjen e lëndës së parë në Doganë derisa të shqyrtohen aplikacionet nga ATK-ja.

Gjithashtu, kjo odë kërkon që kjo procedurë të hiqet ashtuqë të mos obligohen bizneset të aplikojnë çdo vit.

Bëhet e ditur se kërkesa në fjalë është drejtuar edhe kryeministrit, Ramush Haradinaj.