Për çdo ankesë në Odën e Mjekëve të Kosovës (OMK) pacientët duhet të paguajnë 30 euro. Këtë e ka konfirmuar drejtori i OMK-së, Pleurat Sejdiu, sipas të cilit kjo tarifë nuk është e lartë, shkruan sot Koha Ditore.

“Ne ia paguajmë 40 euro një anëtari të komisionit për shqyrtimin e një lënde. Ky çmim nuk është i lartë, sepse edhe në gjykatën e shtetit ankesat kushtojnë 40 euro”, ka thënë Sejdiu.

Ai ka theksuar se vendimi është brenda kuadrit ligjor dhe se rastet sociale janë të përjashtuara nga kjo pagesë. Ndaj vendimit të Odës së Mjekëve ka reaguar Shoqata e të Drejtave të Pacientëve të Kosovës. Kjo shoqatë është ankuar tek Avokati i Popullit, Ilmi Jashari.

“Ende nuk kemi marrë përgjigje për ankesën që e kemi adresuar tek Avokati i Popullit. Pas marrjes së një përgjigjeje do të mundë të japim deklaratë”, ka thënë Besim Kodra nga kjo shoqatë.