Presidentja e Kosovës, Vjosa Osmani, ka thënë se Kosova nuk do të hyjë në aventura të rrezikshme siç është ndryshimi i kufijve të Kosovës në kuadër të procesit të dialogut më Serbinë, raporton Ekonomia Online.

Ajo në konferencën e përbashkët me ministrin e Jashtëm të Gjermanisë, Heiko Maas, tha se Kosova do të jetë pjesë e dialogut, por që duhet të rishikohen marrëveshjet e kaluara. Ajo tha se presin që ky proces të përfundojë me njohje reciproke.

“Dialogu me Serbinë është një proces ku Kosova ka qenë e angazhuar që nga fillimi dhe republika jonë ka ofruar dorën e bashkëpunimit, por fatkeqësisht Serbia ende nuk ka kërkuar falje për krimet e kryera në Kosovë dhe ende nuk ka drejtësi për mijëra mijëra viktima të Kosovës.”

“Si institucione të Kosovës e informova ministrin që ne do të vazhdojmë të ngrehim zërin dhe të bëjmë çmos që të ketë drejtësi për të gjitha këto viktima.” “Për ne, ky proces ka nevojë për një reset, pra nuk është thjeshtë një vazhdimësi. Institucionet tona vëmendshëm do ta shqyrtojnë secilin marrëveshje qe arritur dhe secilin dokument të shqyrtuar deri më tani. Do të zhvillojmë një dialog të bazuar në parime të qarta ku Republika e Kosovës në asnjë mënyrë nuk do të hyjë në asnjë aventurë të rrezikshme, që kanë të bëjnë me ndryshim te kufijve, logjik kjo që i takon shekullit të kaluar.”, tha Osmani.

Osmani  tha se prioritet i institucioneve të Kosovës, është menaxhimi i pandemisë dhe sigurimi i vaksinës, anti Covid, duke falënderuar Gjermaninë për mbështetjen e deri tanishme, por edhe duke kërkuar ndihmë  për sigurimin e vaksinave.

“E falënderova ministrin për ndihmën që ka dhënë Gjermania përmes iniciativë COVAX dhe po ashtu BE-së. Deri tani Kosova ka marr 24 mijë vaksina dhe 95 mijë të tjera priten por kjo akoma është përqindje shumë e vogël dhe shpreha interesimin që të vazhdohet bashkëpunimi me Gjermaninë në të ardhmen në çfarëdo lloj instrumenti që Gjermania e sheh të arsyeshme dhe nevojshëm sepse vaksinat do të jenë të domosdoshme në mënyrë qe ne të mund të menaxhojmë këtë pandemi.”

Ajo kërkoi po ashtu që liberalizimi i vizave për Kosovën të ndodhë.

“Çështja e dytë që e trajtova liberalizimin e vizave, një proces në të cilin Kosova ka plotësuar kriteret dhe falënderoj ministrin për përkrahje që institucionet e Gjermanisë e kanë dhënë në këtë drejtim. Presim qe vendet anëtare të BE-se të përmbushin premtimin e tyre që akoma po mbahet padrejtësisht i izoluar.”