Kryetarja e Kuvendit, Vjosa Osmani ka thënë se kolonel Ahmet Krasniqi dha gjithçka për vendin dhe nuk mori asgjë si shpërblim përveç një plumbi të pabesë, raporton Ekonomia Online.

Pas përurimit të shtatores së tij në sheshin e Vushtrrisë, Osmani shtoi se Tirana ia ka borxh Kosovës zbardhjen e vrasjes së Ahmet Krasniqit.

Duke shtuar se po flitet shumë për vrasje e tij, por që nuk është bërë asgjë në këtë drejtim.

“Kontributi i tij i ka rrënjët thellë në liri dhe pa këtë vizion të tij dhe bashkëluftëtarëve tjerë, ne sot nuk do ta gëzonim lirinë. Vrasja tinëzare ishte tepër e rëndë. Ai u vra në Tiranë gjatë përpjekjeve titanike të tij për ndaljen e represionit të Serbisë”.

“Sot për të flitet shumë, por nuk është bërë asgjë për zbardhjen e vrasjes së tij. Ne e kemi borxh zbardhjen e vrasjes së tij. Në skenën tonë politike është bërë rutinore që të gjejnë strehë në bashkëpunim edhe ata që dikur rivalitetin politik e shihnin edhe në tytën e armës”.

“Zëri i kolonelit thërret për unifikim, por jo unifikim me krimin, por me ata që e duan Republikën sikurse Ahmet Krasniqi. Tirana ia ka borxh Kosovës dhe gjithë shqiptarëve zbardhjen e vrasjes së Ahmet Krasniqit”.

Kryetari i Komunës së Vushtrrisë, Xhafer Tahiri, ka thënë se madhësia e një qyteti nuk matet me territor, por me trashëgimi, kulturore e patriotike.

 Vushtrria më herët dha Hasan Prishtinën e më pas UÇK-së, i dha Kolonel Ahmet Krasniqin.

Ai ka falënderuar të gjithë ata që përkrahën ndërtimin e sheshit dhe shtatores, raporton EO.

“Krasniqi me përgatitjen e tij ushtarake ishte tmerri i armikut, që më pas u vra tinëzisht. Ahmet Krasniqi ishte unifikues i luftës për liri”.