Drejtori i Zyrës për Kosovën në Qeverinë e Serbisë, Petar Petkoviq, ka thënë që kryeministri i Kosovës, Albin Kurti, me vendimin për ndalimin e referendumit të 16 janarit të paralajmëruar nga Serbia po tenton sipas tij, ta thellojë krizën.

“E drejta e votës është një e drejtë themelore njerëzore dhe qytetare, të cilën Kurti dëshiron ta heqë për serbët në Kosovë dhe vendimi për themelimin e misionit të OSBE-së e thekson qartë këtë të drejtë, është pjesë e mandatit të tyre”, ka thënë Petkoviq, raporton Tanjug.

Petkoviq tutje thotë se për këtë çështje i janë drejtuar edhe Brukselit dhe vendeve të Kuintit.

“Prandaj iu drejtuam edhe Brukselit edhe vendeve të Kuintit, të cilat janë duke e shqyrtuar seriozisht këtë çështje dhe pres një përgjigje pozitive, sepse arbitrariteti i Albin Kurtit është shkelje e drejtpërdrejtë e të drejtave themelore të njeriut”, tha Petkoviq.