Shumë mësimdhënës do të mbesin pa punë në vitin e ardhshëm. 60 është numri i atyre që pritet të mbesin jashtë listës së pagave në 2019. Komunarët thonë se “urdhri” ka ardhur nga lart – Ministria e Financave.

Këtë lajm e ka bërë publik shefi i Grupit të këshilltarëve të PDK-së, Rafet Llapashtica. Ai gjatë seancës së Kuvendit Komunal ka thënë se është shqetësuese zvogëlimi i numrit të mësimdhënësve për 60, shkruan sot Koha Ditore.

“Më ka shqetësuar lajmi që na e dha dje në Komitetin për Politikë dhe Financa drejtori për Buxhet dhe Financa se në vitin 2019 do të largohen 60 punëtorë të arsimit. Sipas tij, kjo po ndodh për shkak të angazhimit të stafit gjatë fushatës zgjedhore.

“Angazhimi i stafit me ligj është në proporcion me numrin e nxënësve. Por angazhimi i dyfishtë në kohë fushate ose pas saj ka bërë këto dëme. Nën 1. dëmi është se në 2019, 60 mësimdhënës do të hiqen, 2. është dëmtuar stafi profesional që ia keni marrë orët për t’ua dhënë të tjerëve, 3. i keni dëmtuar edhe prindërit e nxënësit që u keni dërguar mësimdhënës joadekuatë”, ka thënë Rafet Llapashtica.