Policia e Kosovës përmes një komunikate për media ka bërë thirrje për kujdes të shtuar në trafik.

Sipas Policisë, të gjithë pjesëmarrësit në trafik e veçanërisht drejtuesit e automjeteve duhet të kenë kujdes sidomos gjatë kohës kur ka të reshura atmosferike, me qëllim të reduktimit të aksidenteve.

Më poshtë lexoni apelin e Policisë:

Policia e Kosovës me qëllim të reduktimit të aksidenteve në trafikun rrugor apelon tek të gjithë pjesëmarrësit në trafik, në veçanti drejtuesit e automjeteve, që të jenë të kujdesshëm dhe sa më vigjilentë gjatë drejtimit të automjeteve të tyre.Vëmendje kërkohet, posaçërisht në këtë periudhë kur kemi të reshura atmosferike, ku mund të ketë kufizim të dukshmërisë, paraqitje të ngricave, rrugët bëhen më të rrëshqitshme dhe qarkullimi nëpër rrugë vështirësohet.
Drejtuesit e automjeteve duhet të posedojnë pajisje dimërore dhe të respektojnë rregullat që dalin nga ligji i trafikut.
Policia e Kosovës me njësitet e saj vazhdon të monitorojë dhe të menaxhojë situatën në trafikun rrugor nëpër të gjitha rrugët e vendit dhe aty ku pjesëmarrësit bien ndesh me rregullat në trafik, masa ndëshkuese ligjore do të aplikohen me qëllim të parandalimit të rasteve të aksidenteve në veçanti atyre me fatalitet që po paraqesin shqetsim për të gjithë dhe po shkaktojnë humbje të jetëve njerëzore.