Policia e Kosovës gjatë ditës së djeshme ka zhvilluar një operacion të gjerë bastisjesh kundër krimit të organizuar në shtatë rajone të vendit në bashkëpunim Doganën e Kosovës,  Administratën Tatimore të Kosovës dhe Inspektoratin e Ministrisë së Tregtisë dhe Industrisë.

Në këtë operacion sipas zëdhënësit të Policisë së Kosovës Daut Hoxha, Policia ka arrestuar 8 persona, dhe ka sekuestruar 26 kg ari, 33 kg argjend, tri vetura, një autobusë dhe 5 800 euro para kesh, në përpjekje për luftimin e krimit të organizuar dhe kontrabandës me mallra.

Sipas Policisë së Kosovës ka edhe disa persona të tjerë që janë nën hetime, por që janë në proces gjyqësor.

Ndërsa 8 personat të dyshuar, që janë të involvuar në vepra të ndryshme kriminale kryesisht në krim të organizuar dhe kontrabandim me mallra, sot dalin para gjykatës nga gjyqtari i procedurës paraprake ku do t’iu caktohet paraburgimi.

Drejtori i Drejtorisë për Hetimin Krimit të Organizuar Rexhep Fetahu, tha se gjatë zhvillimit të këtij operacioni e kanë pasur përkrahjen nga ATK-ja, Dogana e Kosovës, e cila ka konfiskuar dëshmi të rëndësishme dhe Inspektoratin e MTI-së.

Gjatë këtij operacioni janë arrestuar të dyshuarit:

1. V. I.        dt. L. 1988     Kosovar/shqiptar
2. G. I.        dt. L. 1963      Kosovar/shqiptar
3. B. I.        dt. L. 1986      Kosovar/shqiptar
4. SH. B.   dt. L. 1987      Kosovar/shqiptar
5. I. B.        dt. L. 1962      Shtetas i Turqisë
6. T. L.       dt. L. 1991      Kosovar/shqiptar
7. H. I.       dt. L. 1966      Kosovar/shqiptar
8. A. I.        dt. L. 1997     Kosovar/shqiptar

Ndërsa janë sekuestruar si prova materiale:

1. 26 (njëzet e gjashtë) kilogram ari;
2. 33 (tridhjetë e tre) kilogram argjend;
3. 3 (tri)  vetura;
4. 1 (një) autobus;
5. 4900 (katër mijë e nëntëqind) euro;
6. Dokumente të ndryshme relevante që vlejnë si prova për procedurë.