Ministria e Punëve të Jashtme dhe Diasporës (MPJD) ka njoftuar se gjatë ditës së sotme një numër i stafit të Ministrisë dhe Kabinetit, janë testuar për COVID-19 nga ekipet e Institutit Kombëtar të Shëndetësisë Publike të Kosovës (IKSHPK).
Testimet janë bërë për shkak se një punonjëse e MPJD-së, ditë më parë u konfirmua me këtë virus, të marrë nga një familjar i saj. Për fat të mirë, të gjitha testimet e sotme kanë rezultuar negative.
MPJD thotë se që nga momentet e para të dyshimeve e deri më sot me rezultatet negative, ka ndërmarrë të gjitha veprimet e nevojshme parandaluese, sipas udhëzimeve nga institucionet tona. Këto masa do të vazhdojnë të aplikohen deri në tejkalimin e situatës.
“Për këtë motiv, për ta mbrojtur shëndetin publik, sot dhe nesër të gjitha takimet fizike të parapara i kemi anuluar”, thuhet në njoftimin për shtyp, përcjell EO.
Nga e mërkura, MPJD thotë se do vazhdojë me takime virtuale deri në relaksimin e masave, konform rekomandimeve të IKSHPK-së.