Presidenti i Republikës së Kosovës, Hashim Thaçi i ka siguruar qytetarët se institucionet e shtetit kanë përvoja me situata të rënda dhe janë të përgatitur të përballen me çdo situatë.

Ai nëpërmjet një shkrimi në Facebook i ka bërë thirrje qytetarëve që të rrinë të qetë dhe të kenë kujdes. Thaçi ka thënë se na nevojitet kujdes, vigjilencë, solidaritet, durim, urti, besim, vlera të cilat sipas tij,  kemi kalitur në sfidat që i kemi kaluar.

Ky është postimi i plotë i presidentit Thaçi:

Të dashur qytetarë,

Jam duke i përcjellë me shumë vëmendje dhe me shumë kujdes zhvillimet rreth virusit COVID-19, përhapjen e tij në Kosovë, rrezikun që paraqet dhe reagimin e shtetit dhe shoqërisë sonë.

Sot na nevojitet kujdes, vigjilencë, solidaritet, durim, urti, besim. Këto vlera e parime i kemi kalitur në sfidat që i kemi kaluar.

Prandaj, ju bëj thirrje që të rrini të qetë, të kujdeseni për veten dhe familjet tuaja, të kufizoni lëvizjet, të mos dilni nga shtëpitë pa nevojë dhe të qëndroni sa më shumë brenda.

Jini të sigurt që institucionet e shtetit janë duke e përcjellë çdo zhvillim dhe janë të gatshme të veprojnë në çdo rrethanë për t’iu dalë juve në ndihmë.

Nuk ka nevojë për panik dhe frikë. Kemi përvojë me situata të rënda dhe institucionet tona janë të përgatitura të përballen me çdo situatë.

Të bashkuar do ta përballojmë me sukses edhe këtë sfidë dhe si gjithmonë do të dalim edhe më të fortë dhe do të vazhdojmë të punojmë së bashku, që ta bëjmë Kosovën shtëpi edhe më të dashur për ju të gjithë. HTH