Kryetari i Komunës së Prishtinës Shpend Ahmeti, bashkë me përfaqësuesin e AKR-së, Selim Pacollin, prezantuan sot marrëveshjen e re të bashkëpunimit në mes të VETËVENDOSJE-s dhe AKR-së, si vazhdimësi e punës së përbashkët që është bërë deri tani në Komunën e Prishtinës.

“Ne synojmë ta ndërtojmë shumicën në Kuvendin Komunal me subjektet me të cilat kemi bashkëpunuar dhe kemi bashkë qeverisur më herët. Pas 22 tetorit kanë ndryshuar rrethanat dhe raporti i forcave në Kuvendin Komunal. Tash, bashkë me subjektet me të cilat kemi qenë në koalicioni, i kemi mbi 60% të asamblistëve në Kuvend Komunal. Marrëveshja me AKR-në është marrëveshje mes programeve tona, për vazhdimin e reformave që i kemi filluar më parë. I kemi bashkuar pikat më të mira programore të VETËVENDOSJE!-s dhe të AKR-së, e nuk kemi bërë ndarje postesh”, tha Ahmeti.

Në fjalën e tij të rastit, Selim Pacolli tha se vazhdimi i bashkëpunimit me VETËVENDOSJE!-n po bëhet për t’i ofruar qytetarëve të Prishtinës programin më të mirë për mandatin e radhës.

“Programi jonë i përbashkët për katër vitet e ardhshme është program që garanton zhvillim të qëndrueshëm për Komunën e Prishtinës. Iu garantoj votuesve që përmes kësaj marrëveshjeje do të realizohen pikat më të mira programore, në të cilat kanë besuar më 22 tetor ata votues”, tha ndër të tjera Pacolli.