Prokuroria Themelore në Gjakovë, Departamenti i Përgjithshëm, njofton se ndaj të pandehurit me inicialet Sh.B., ka marrë aktvendim për fillimin e hetimeve, si dhe ka paraqitur kërkesë për caktimin e masës së paraburgimit, në kohëzgjatje prej 30 ditësh, nën dyshimin për pengim të personit zyrtar në kryerjen e detyrave zyrtare.

Sh.B., dyshohet se pengoi një gjyqtar derisa ishte në terren për një kontest pronësor.

“Sipas kërkesës së Prokurorisë, ndër të tjera ceket se ekziston dyshimi i bazuar se i pandehuri me inicialet Sh.B., më dt.07.10.2025 rreth orës 09:30 min, në fshatin Berish, Komuna Malishevë, me forcë tenton ta pengoj personin zyrtarë në kryerjen e detyrës zyrtare dhe atë të dëmtuarin N.Q., – Gjyqtar në Gjykatën Themelore Gjakovë – Dega Malishevë – Departamenti i Përgjithshëm Divizioni Civil, në atë mënyrë që ditën kritike derisa i dëmtuari ka qenë në teren së bashku me procesmbajtësin/dëshmitarin për një kontest pronësor, aty shkon i pandehuri fillimisht debaton me avokatin ku i drejtohet me fjalët “Pse ke hyr në këtë lëndë”, ku avokati kërkon nga Gjyqtari që ta konstatoj këtë, i dëmtuari /Gjyqtari i prezantohet të pandehurit si Gjyqtar i lëndës dhe e ka lutur që mos të pengohet seanca në teren se përndryshe është i detyruar ta thërras policinë”, thuhet në njoftim.

Mirëpo, thuhet se i pandehuri nuk e respektoi policinë dhe me tone të larta i përgjigjet me fjalët “Unë jam mësuar që të shkoj në polici dhe thirri edhe njësinë speciale”, duke vazhduar që të pengojë gjyqtarin me duar në gjoksin e tij.

Me këto veprime, i pandehuri dyshohet se ka kryer veprën penale “Pengim i personit zyrtarë në kryerjen e detyrave zyrtare” nga neni 401, par.5 lidhur me par.1 të Kodit Penal.

I pandehuri që nga data 7 tetor 2025, me vendim të Prokurorit të Shtetit gjendet nën masën e ndalimit 48 orësh.