PSD: Telekomin e braktisi Qeveria Kurti

Prishtinë | 24 Kor 2020 | 10:59 | Nga Ekonomia Online

Partia Socialdemokrate konsideron se Qeveria Kurti është fajtore për situatën e krijuar në Telekom.

Në një komunikatë për medie, PSD kërkon përgjegjësi nga ish-kryeministri Albin Kurti dhe ish-ministrja e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike (MEPTINIS), Rozeta Hajdari, për humbjen e lëndës së Telekomit.

Komunikata e plotë:

Çfarë kohërash, çfarë ngjarjesh?! Sapo e kuptuam se Z-Mobile mund ta fitojë edhe një arbitrazh kundër ndërmarrjes më fitimprurëse publike, Telekomit, duke e çuar atë drejt falimentimit, pa një përgjijgje në padi nga institucionet publike. Asnjë fjalë! Dhe kur? Kur po qeverisnin “bijtë e popullit” kundër oligarkëve.

Shihni si paska ndodhur, përgjigja në padi e përgatitur nga stafi i afërt i ministres, bashkë me Avokaturën Shtetërore paska humbur nëpër sirtarët e administratës. Gjithë ato borde u shkarkuan, kurse lënda e Telekomit paska humbur. A dëgjuat, fajin për këtë e paska SHIK-u. Si është e mundur që një lëndë aq e rëndësishme, rreth të cilës angazhohen gjithë ata profesionistë, thjesht humbet rrugës. A nuk kërkoi llogari direkte për këtë ministrja Hajdari e kryeministri Kurti?! A u pushua nga puna dikush për këtë papërgjegjësi?

Ish kryeministri Kurti dhe ish ministrja Hajdari duhet të përgjigjen për këtë. Qeveria që ata udhëhiqnin nuk e paska mbrojtur Telekomin. Ky është fakti. Për shkaqet e motivet nuk do t’i kopjojmë diskurset e tyre komplotiste, por kërkojmë hetim deri në fund. Pavarësisht se në derën e kujt shpie ky hetim.

Kjo ngjarje e konfirmon edhe një herë hipokrizinë që e kaluam. Terminalet e shumëpërmendura të oligarkëve as nuk u zunë në gojë. T’u rritej tatimi, nuk u bë fjalë.

Neoliberalizmi grabitqar e ka dorë të djathtë zyrtarin e korruptuar shtetëror. Në anën tjetër, në pamundësi për t’i përmbushur pritjet, veçori e populistëve po bëhet gënjeshtra në emër të popullit. Të dyja këto duhet t’i refuzojmë.

Fjalë Kryesore:

Të ngjashme