Bordi Ndërkombëtar i Kontrollit të Narkotikëve publikoi raportin për vitin 2017, i cili bazohet në disa raporte mbi lëndët narkotike, substancat psikotrope, perkursorët dhe përbërësit kimikë të përdorur në prodhimin e paligjshëm të drogave.

Shqipëria në këtë raport konsiderohet si furnizuesi kryesor i kanabisit të Bashkimit Europian.

Në paragrafin me nr. 748 thuhet se:

Kanabisi kultivohet kudo në kushte shtëpie në Bashkimin Europian dhe trafikohet nga rajone të ndryshme jashtë tij. Shqipëria mbetet burimi kryesor i furnizimit të kanabisit që është trafikuar në Bashkimin Europian.

Në paragrafin nr. 753 thuhet se:

Në Shqipëri, gjatë vitit 2016 situata e kanabisit u karakterizua nga rritja e numrit të parcelave ku kultivohej kanabisi, ç’ka u shoqërua me një shtim të rrugëve të trafikut pëfshirë këtu edhe trafikun e drogës në rrugë ajrore. Për shkak të rritjes së kultivimit, çmimi i kanabisit në Shqipëri ra në 100 deri në 400 euro për kilogram.

Në raport, rruga ballkanike dominon korridorin e trafikut të drogave në Europën Lindore. Në këtë rrugë, lëndët opioide trafikohen nga vendburimet origjinale, si Afganistani, Pakistani dhe Republika Islamike e Iranit, tranzit përmes Turqisë, Ballkanit e përfundojnë në Europën Qendrore e Perëndimore.

Në Ballkan janë ndërruar shpesh degët e mafies, por rruga kryesore mbetet ajo përmes Bullgarisë, Serbisë, Bosnje-Hercegovinës, Kroacisë, Sllovenisë dhe Austrisë, ndërsa një pjesë më e vogël trafikohet përmes Maqedonisë dhe Kosovës, zakonisht për magazinim dhe paketim, shkruan lapsi.al

Në kah të kundër trafikohen drogat sintetike nga Europa Perëndimore. Grupet kriminale shqiptare bashkëpunojnë ngushtësisht me ato në Greqi, Itali, Kosovë, Mal të Zi, Serbi, Maqedoni dhe Turqi.

Megjithatë, bashkëpunimi ndërkombëtar me kandidatë dhe vende potencialisht kandidate për në BE, si për shembull me Shqipërinë, Bosnjen, Serbinë dhe Maqedonisë, vijon fuqishëm duke asistuar dhe zhvilluar më tej sistemet e tyre të brendshme të interceptimit, bazuar mbi kornizat ndërkombëtar.

“Greqia dhe Italia janë destinacionet kryesore të heroinës së trafikuar. Gjithnjë e më shumë heroinë e trafikuar është mbajtur në Shqipëri, për përdorim lokal”, thuhet në raport.