Të paktën shtatë persona janë vrarë nga sulmet e reja ruse në Ukrainë, vetëm pak orë para takimit mes presidentit amerikan Donald Trump dhe presidentit ukrainas Volodymyr Zelensky në samitin e NATO-s që po mbahet në Ankara.

Sipas autoriteteve ukrainase, një person humbi jetën në kryeqytetin Kiev, ku një sulm me raketa shkaktoi zjarr në disa depo, njoftoi kryebashkiaku Vitali Klitschko.

Një shpërthim i fuqishëm u dëgjua pak pas mesnatës, madje përpara se të aktivizoheshin sirenat e alarmit ajror, një dështim i rrallë i sistemit paralajmërues që ka shqetësuar banorët e kryeqytetit, shkruan Euronews.

Në rajonin jugor të Mykolaivit, një nënë dhe vajza e saj u vranë nga bombardimet ruse me bomba ajrore të drejtuara, bëri të ditur kreu i administratës ushtarake rajonale, Vitaliy Kim.

Dy persona të tjerë u vranë në rajonin verilindor të Kharkivit, ndërsa dy të tjerë humbën jetën në rajonin jugor të Khersonit, pranë vijës së frontit, sipas zyrtarëve lokalë.

Rusia ka intensifikuar sulmet ndaj Kievit gjatë javës së fundit. Vetëm këtë muaj, sulmet me raketa balistike dhe dronë kanë shkaktuar më shumë se 50 viktima në kryeqytetin ukrainas.

Ndërkohë, në samitin e NATO-s në Ankara, presidenti Zelensky u ka bërë thirrje aleatëve që të furnizojnë Ukrainën me municione për sistemet amerikane të mbrojtjes ajrore Patriot, të cilat konsiderohen jetike për të ndalur raketat balistike ruse.

Nga ana tjetër, Ukraina ka shtuar sulmet ndaj të ashtuquajturës “flotë hije” të Rusisë, cisterna të vjetra që transportojnë naftë dhe sigurojnë të ardhura të rëndësishme për ekonominë ruse. Sipas komandantit të forcave ukrainase të dronëve, gjatë 72 orëve të fundit janë goditur 21 anije ruse në Detin e Zi dhe Detin Azov.