Ai ka bërë apel në drejtim të krerëve të shtetit, Policisë së Kosovës dhe ekspertëve të komunikacionit që të zbulojnë të vërtetën e kësaj vdekje, ku mbetën të vdekur gjithsej katër persona.

“Jo të mbulohet e vërteta për arsye se në këtë aksident u përfshi edhe ambasadorja turke… jeta për të gjithë është e çmueshme njësoj”, ka thënë ai.

Shala ka bërë thirrje edhe për kujdes të shtuar në komunikacion, duke uruar që askujt të mos i ndodhë kjo që i ka ndodhur familjes së tij.

Më poshtë mund ta lexoni të plotë deklaratën e Shalës:

Të dashur miq, shokë e dashamirë, institucione të Kosovës, ju media

Në emrin tim e të familjes, ju falënderoj për pjesëmarrjen në ceremoninë e varrimit të më të dashurve tanë!

Unë sot mbeta pa vëllanë e vogël, pa babanë dhe pa gjyshen, shkaku i shpejtësisë dhe pakujdesisë në komunikacion.

U bëj apel presidentit, kryeministrit, Policisë së Kosovës, ekspertëve të komunikacionit që të dimë kush është fajtori i kësaj vdekjeje të katërfishtë.

Jo të mbulohet e vërteta për arsye se në këtë aksident u përfshi edhe ambasadorja turke… jeta për të gjithë është e çmueshme njësoj.

Kam informata nga kalimtarët e rastit se në momentet kritike, policia e Kosovës nuk ka reaguar me ofrimin e ndihmës menjëherë për familjarët e mi, të cilët kanë qenë me lëndime të rënda vdekjeprurëse, por janë orientuar te ambasadorja turke.

Unë nuk humba vetëm një anëtar të familjes, unë humba tre, pothuajse gjysmën e familjes.

Dhembja neve do të na shoqërojë tërë jetën, asnjëherë nuk do gjejmë qetësi, uroj që të mos i ndodhë askujt kjo që na ka ndodhë neve…

U bëj apel të gjithëve që të ngadalësojnë shpejtësinë në komunikacion e mos të humbin jetët e të dashurve të tyre.

Do t’ju kujtojmë me mall e me lot në sy më të dashurit e tanë, vëllai im, që shkove në kohen më të mirë, baba dhe gjyshe!

U prehshi në paqe në parajsë të dashurit e tanë!