Përzgjedhësi i Kombëtares së Kosovës, Bernard Challandes, ka thënë se djelmoshat kosovarë duhet ta luajnë një lojë të çmendur për ta mposhtur Çekinë.

Dhe kjo ndeshje e shumëpritur do të zhvillohet sot në stadiumin “Fadil Vokrri” në Prishtinë duke filluar nga ora 15:00.

Kësaj përballjeje do t’i mungojnë yjet si Arbër Zeneli dhe Milot Rashica për shkak të lëndimeve që kanë marrë.

Duke e parë këtë mungesë të futbollistëve në fjalë, trajneri Challandes ka thënë se nuk ka ndonjë zgjidhje individuale për këtë situatë, por se duhet të punojnë si kolektiv shumë më shumë.

“Kur unë flas për lojën e çmendur, nuk mendoj për individë. Në një lojë të çmendur nuk vlen taktika, por është vullneti – unë duhet ta fitoj këtë lojë. Nevojitet një mentalitet që në çdo moment lojtari është në pritje për ta marrë topin dhe për të shënuar”.

Kjo ndeshje futbollistike zhvillohet në kuadër të kualifikimeve për Euro 2020.