Kina po përballet me disa ngjarje ekstreme të motit, përfshirë tornado dhe stuhi të fuqishme. Të paktën 11 persona kanë humbur jetën, qindra janë plagosur dhe mijëra janë evakuuar.

Presidenti kinez Xi Jinping u ka bërë thirrje zyrtarëve që të bëjnë “çdo përpjekje” për të shpëtuar personat e prekur nga stuhitë. Ai kërkoi mobilizimin e burimeve për trajtimin e të plagosurve, strehimin e banorëve të prekur dhe realizimin e punëve për parandalimin dhe menaxhimin e katastrofave.

Në provincën qendrore Hubei, të paktën 11 persona kanë humbur jetën dhe mbi 330 janë plagosur pas stuhive të fuqishme. Një person vazhdon të jetë i zhdukur.

Në disa zona të Hubeit janë regjistruar edhe tornado, një fenomen i rrallë për këtë rajon. Stuhitë me bubullima dhe erërat e forta goditën disa qytete, duke shkaktuar dëme të mëdha. Erërat e fuqishme përmbysën makina, shkatërruan çati dhe dëmtuan mijëra ndërtesa.

Ndërkohë, provincat jugore Guangxi dhe Guangdong kanë ngritur alarmin për përmbytje në nivelin më të lartë. Reshjet e dendura, të shkaktuara nga tajfuni Maysak, kanë shkaktuar dëme të mëdha dhe kanë detyruar dhjetëra mijëra njerëz të largohen nga shtëpitë e tyre.

Autoritetet në Guangxi kanë raportuar për viktima dhe mijëra persona të prekur nga përmbytjet, ndërsa operacionet e shpëtimit dhe ndihmës vazhdojnë.

Përmbytjet janë një dukuri e zakonshme në Kinë gjatë muajve të verës, por intensiteti i këtyre ngjarjeve ka shkaktuar shqetësim të madh te autoritetet, shkruan DW.