Sulmet izraelite në Gaza lanë një krater të madh në një spital, më pak se 48 orë pasi presidenti amerikan Donald Trump njoftoi se Hamasi dhe Izraeli kanë rënë dakord të avanconin një plan armëpushimi, thanë autoritetet lokale.

Ministria e Shëndetësisë në Gaza tha se sulmi shkatërroi furnizime jetike mjekësore.

“Kur ilaçet bombardohen… sëmundja shndërrohet në armë lufte”, tha në një deklaratë Dr. Munir Al-Bursh, drejtori i përgjithshëm i ministrisë.

Sulmi shkatërroi dy depo mjekësore në Spitalin e Dëshmorëve Al-Aksa dhe dëmtoi edhe dy të tjera, tha Ministria e Shëndetësisë. Drejtori i përgjithshëm shtoi se një kamp i afërt për të zhvendosurit u rrafshua me tokë dhe tendat e civilëve pësuan dëme të mëdha.

Ushtria izraelite tha se kishte në shënjestër militantë të Hamasit, por se do të japë më shumë detaje në një deklaratë të mëvonshme.

Pamjet nga vendi i ngjarjes tregojnë njerëz duke kërkuar mes gropës së madhe, në përpjekje për të shpëtuar furnizime mjekësore si lëngje për infuzion, tuba për frymëmarrje, maska kirurgjikale dhe pambuk, të mbuluara nga rrënojat.

“Shkatërrimi i një depoje mjekësore, në një kohë kur sistemi shëndetësor i Gazës tashmë po përballet me mungesë prej 51% të barnave thelbësore … është një sulm i drejtpërdrejtë ndaj një prej hallkave të fundit jetike të kujdesit shëndetësor”, tha Al-Bursh.

Gjatë dy ditëve të fundit, tetë civilë janë vrarë, ndërsa 76 të tjerë janë plagosur, tha të shtunën Ministria Palestinez e Shëndetësisë. Më shumë se 1.200 palestinezë janë vrarë që nga njoftimi i marrëveshjes për armëpushim në tetor të vitit të kaluar.

Për kontekst: Sulmet e fundit vijnë menjëherë pasi Trump njoftoi të enjten në mbrëmje se Hamasi kishte rënë dakord të “çarmatosej plotësisht”, së bashku me tërheqjen e trupave izraelite. Megjithëse ky zhvillim shënoi përparim në planin drejt paqes, i cili kishte mbetur prej kohësh në vendnumëro dhe ishte nisur vitin e kaluar nga Bordi i Paqes i Trumpit, ende duhet të zgjidhen çështje të rëndësishme.

Kryeministri izraelit Benjamin Netanyahu ende nuk ka komentuar njoftimin e Trumpit, por një zyrtar izraelit i tha CNN se Izraeli nuk do të tërhiqet nga Gaza pa u çarmatosur më parë Hamasi.

Zotimi francez “që Kosova të bëhet sa më shpejt anëtare e KiE”, Ambasada e Gjermanisë: Të zbatohen obligimet dhe të sigurohet mbështetja
Read more