Shërbimi Emergjent i Qendrës Klinike Universitare të Kosovës (QKUK) njofton se më 17 shtator, në vendin e tij të punës është sulmuar fizikisht specialisti i mjekësisë emergjente S. B, nga një familjar i një pacienti.

Rasti menjëherë është proceduar te Policia e Kosovës e cila në bashkëpunim me organet e tjera kompetente po merret me rastin.

Drejtori i shërbimi emergjent e ka njoftuar për rastin edhe drejtorin e përgjithshëm të Shërbimit Spitalor Klinik Universitar të Kosovës, duke shpjeguar se janë duke u grumbulluar të gjitha faktet për këtë rast.

Sipas një komunikate shtypi të QKUK-së, “stafi i Shërbimit Emergjent në QKUK kërkon nga organet e drejtësisë që sa më shpejtë të zbardhin të vërtetën në lidhje me rastin dhe të ofrohet siguri maksimale në punë në mënyrë që të kryejnë punën e tyre pa presione dhe frikë nga familjarët e frustruar që janë jashtë vetvetes duke menduar se mjekët janë fajtorë për atë çka ju ka ndodhur atyre”.

“Ky nuk është rasti i parë i sulmit ndaj mantelbardhëve të Qendrës Emergjente, meqë aty trajtohen pacientë me sëmundje të rënda, përfshirë rastet e varura nga alkooli, droga, por edhe rastet të tjera të të lënduarve me armë zjarri dhe aksidente të ndryshme, ku fyerjet, presionet dhe sulmet fizike ndaj stafit kanë qenë evidente”.

Stafi i Shërbimit Emergjent kërkon nga gjithë familjarët e pacientëve të mos pengojnë punën e tyre, por të lejojnë që punën ta kryejnë pa presione ngase profesionistit shëndetësor është mjaftë e ndjeshme dhe kërkon intervenim të shpejtë.

Mjekët e këtij shërbimi shfaqin shpresën se organet e rendit dhe ato të drejtësisë do të kryejnë punën e tyre dhe stafi të ketë siguri gjatë kryerjes së shërbimeve mjekësore.