Më shumë se 300 persona raportohet të jenë lënduar gjatë një kryengritjeje në një burg në rajonin Irkutsk të Rusisë. Besohet që dhuna shpërtheu pasi një rojë e kishte rrahur një të burgosur.

Aktivistët e një grupi të organizatave joqeveritare kanë thënë se forca speciale ruse janë dërguar në burgun numër 15 në Angarsk në përpjekje për ta qetësuar situatën.

Një zëdhënës i Shërbimit Federal të Burgjeve tha se trazira ka filluar në momentin që një i burgosur e ka sulmuar një rojë, duke shtuar se situata tashmë është nën kontroll.

Në disa pamje të publikuara në rrjetet sociale shihen ndërtesat e kapluara nga zjarri dhe të burgosurit dëgjohen duke thënë se po vriten.

Autoritetet ruse nuk i kanë lejuar aktivistët për të drejtat e njeriut që të futen brenda burgut, shkruan “Free Europe”.

Në këtë burg ndodhen rreth 1,300 të burgosur, ndërsa Komisioni Hetues i ka nisur hetimet për këtë rast.