Sindikata e Arsimit ka konfirmuar se janë në përgatitje të një padie për të gjitha komunat që nuk po ua japin tri pagat mësimdhënësve që po pensionohen.

Disa mësimdhënës kosovarë kanë arritur që të marrin tri pagat me rastin e pensionimit, por vetëm pasi kanë bërë padi në gjykata ndaj komunave të cilave iu takojnë.

Sindikata e Bashkuar e Arsimit, Shkencës dhe Kulturës (SBAShK) ka vendosur që të bëjë një padi në emër të të gjithë mësimdhënësve që nuk kanë marrë tri pagat me rastin e pensionimit dhe nuk po i marrin.

Sipas kësaj sindikate janë vetëm disa veta që përmes gjykatës kanë realizuar të drejtën e tyre për t’iu takuar tri pagat me rastin e pensionimit.

Kryesia e kësaj sindikate konfirmon se këta mësimdhënës kanë shpenzuar për avokatë, kurse tash SBAShK-u është në përgatitje të një padie për të gjitha komunat që e kanë obligim t’iu japin këto paga mësimdhënësve që po pensionohen dhe nuk po e bëjnë këtë. Padia do të jetë kolektive, që sipas udhëheqësve të SBAShK-ut iu kursen kohë dhe mund mësimdhënësve.

Kryetari i SBAShK-ut, Rrahaman Jasharaj, ka thënë për gazetën “Zëri” se përveç disa rasteve që kanë kërkuar nga organet e drejtësisë realizimin e së drejtës së tyre, mësimdhënësit tjerë nuk kanë marrë këto paga ende.

Ai thotë se komunat nuk i janë përgjigjur kërkesës së SBAShK-ut. Jasharaj ka theksuar se tri pagat mësimdhënësve duhet t’iu kompensohen sipas ligjit nga niveli lokal dhe jo ai qendror.