Kur temperaturat rriten ndjeshëm, hidratimi bëhet një nga mënyrat më të rëndësishme për të mbrojtur organizmin nga dehidratimi, lodhja nga nxehtësia dhe goditja e nxehtësisë.

Këshillat zyrtare të NHS në Britani rekomandojnë konsumimin e rregullt të lëngjeve dhe shmangien ose kufizimin e alkoolit, pijeve me kafeinë dhe pijeve të nxehta gjatë periudhave me temperatura ekstreme.

Vapa e madhe mund të prekë këdo, por rreziku është më i lartë te të moshuarit, foshnjat dhe fëmijët e vegjël, gratë shtatzëna, si dhe personat me sëmundje të zemrës, mushkërive, veshkave, diabet ose probleme të tjera kronike.

Alkooli

Një gotë pije alkoolike mund të duket tërheqëse gjatë ditëve me diell, por alkooli nuk është zgjedhja më e mirë kur trupi po përpiqet të përballojë temperaturat e larta.

NHS England paralajmëron se alkooli mund të bëjë që organizmi të humbasë lëngje më shpejt, duke rritur rrezikun e dehidratimit gjatë vapës. Nëse konsumohet alkool, rekomandohet që ai të alternohet me ujë dhe të shmanget ekspozimi i zgjatur në diell.

British Red Cross këshillon gjithashtu kufizimin e alkoolit, veçanërisht në mbrëmje, pasi mund të ndikojë negativisht edhe në cilësinë e gjumit gjatë netëve të nxehta.

Pijet me kafeinë

Kafeja, çaji i fortë dhe pijet e tjera me kafeinë janë një tjetër kategori që rekomandohet të kufizohet kur temperaturat janë shumë të larta.

British Red Cross vëren se kafeina mund të shtojë humbjen e lëngjeve dhe këshillon që gjatë dehidratimit të shmangen pijet me kafeinë dhe alkooli.

Kjo nuk do të thotë se një kafe e vetme shkakton automatikisht dehidratim, por gjatë një vale të fortë të të nxehtit uji dhe pijet e ftohta pa alkool mbeten zgjedhja më e mirë për hidratim. Këshilla aktuale e NHS është të pihen më shumë lëngje dhe të shmangen alkooli, kafeina dhe pijet e nxehta.

Pijet shumë të nxehta

Edhe pijet e nxehta përfshihen në rekomandimet e NHS për t’u shmangur gjatë temperaturave ekstreme.

Në vend të tyre këshillohen pije të freskëta, ushqime të ftohta dhe metoda të tjera për uljen e temperaturës së trupit, si dushi i freskët ose lagia e lëkurës dhe rrobave me ujë të freskët.

Shenjat që mund të tregojnë dehidratim

Dehidratimi ndodh kur organizmi humbet më shumë lëngje sesa merr. Në ditët shumë të nxehta kjo mund të ndodhë më lehtë për shkak të djersitjes së shtuar.

Shenja që kërkojnë vëmendje përfshijnë etje të fortë, dhimbje koke, marramendje, lodhje, gojë të thatë, urinim më të rrallë dhe urinë më të errët se zakonisht.

Te foshnjat dhe fëmijët e vegjël duhet pasur kujdes veçanërisht për uljen e urinimit, përgjumjen, irritimin dhe shenja të tjera të humbjes së lëngjeve.

Çfarë duhet pirë gjatë vapës?

Këshilla më e thjeshtë është të pihet ujë rregullisht, edhe para se të shfaqet etja. NHS këshillon konsumimin e lëngjeve gjatë gjithë ditës dhe shmangien e aktivitetit të rëndë gjatë orëve më të nxehta.

Nëse shfaqen marramendje e fortë, konfuzion, rrahje të shpejta të zemrës, temperaturë shumë e lartë ose përkeqësim i gjendjes, këto mund të jenë shenja të një problemi serioz të lidhur me nxehtësinë dhe kërkojnë vlerësim mjekësor. /GazetaExpress/