Trupat shtesë të NATO-s kanë arritur në Kosovë të hënën, pasi mbetën të plagosur 30 trupa të KFOR-it në protestat në veri javën e kaluar. Pjesa më e madhe e tyre janë turq.

Siç bëhet e ditur në një njoftim për medie, rreth 500 pjesëtarë të shërbimit turk nga brigada e 65-të e mekanizuar e këmbësorisë së Turqisë përbëjnë pjesën më të madhe të përforcimeve të NATO-s.

“Batalioni turk fillimisht do të vendoset në kampin Sultan Murat dhe do të jetë në Kosovë për aq kohë sa të jetë e nevojshme. Një batalion shtesë i forcave rezervë të NATO-s është vënë gjithashtu në gatishmëri më të lartë për t’u vendosur nëse është e nevojshme”, thuhet në komunikatë.

Pas bisedimeve me presidentin turk Recep Tayyip Erdogan në Stamboll të dielën, Sekretari i Përgjithshëm i NATO-s, Jens Stoltenberg falënderoi Turqinë për dërgimin e përforcimeve në Kosovë.

“Turqia është një aleate e rëndësishme dhe shumë e vlerësuar, duke dhënë kontribute kyçe në NATO. Këtu përfshihen trupat për misionin tonë paqeruajtës në Kosovë, gjë që është edhe më e rëndësishme tani, kur tensionet janë të larta. Falënderoj Turqinë për dërgimin e përforcimeve në veri të Kosovës, pas trazirave të fundit”, tha Stoltenberg.

Ndërsa, në takimin jozyrtar të ministrave të jashtëm të NATO-s në Oslo javën e kaluar, Sekretari i Përgjithshëm tha se mesazhi i tyre, si për Beogradin ashtu edhe për Prishtinën, është se duhet të angazhohen në mirëbesim në dialogun e lehtësuar nga BE e se “kjo është e vetmja rrugë drejt paqes”.

“Në të njëjtën kohë, NATO ka përgjegjësi për të siguruar stabilitet në Kosovë dhe kjo është arsyeja pse ne kemi qenë atje për shumë vite dhe pse tani po rrisim praninë tonë në rajon”.

“Misioni i KFOR-it është të ruajë një mjedis të qetë dhe të sigurt dhe lirinë e lëvizjes për të gjitha komunitetet që jetojnë në Kosovë, në përputhje me mandatin sipas Rezolutës 1244 të Këshillit të Sigurimit të Kombeve të Bashkuara. KFOR-i aktualisht përbëhet nga mbi 4,200 trupa të kontribuar nga 27 aleatë dhe partnerë të NATO-s”, përfundon komunikata.