Tsipras kritikon Kosovën: Kundër taksës 100% për Serbinë dhe themelimit të ushtrisë

Prishtinë | 22 Dhj 2018 | 11:08 | Nga Ekonomia Online

Kryeministri grek Aleksis Tsipras në një vizitë të tij në Beograd ka deklaruar në prani të presidentit Aleksandar Vuçiç se për Athinën zyrtare zhvillimet e fundit në Kosovë janë të papranueshme dhe të pakëndshme.

“Kishim disa zhvillime të pakëndshme në Kosovë. Flas për një akt të papranueshëm nga ana e Prishtinës, për rritjen e taksave doganore nga ana e Kosovës dhe Bosnjës. Dua të nënvizoj se këto iniciativa jo vetëm që nuk kontribuojnë në stabilitetin e rajonit, përkundrazi ndihmojnë destabilizimin e tij”, u shpreh Tsipras.

Pasi presidenti serb ka theksuar se Serbia është mjaft e shqetësuar në lidhje me situatën e Kosovës, edhe Tsipras ka dënuar vendosjen e taksës doganore në masën 100 % dhe themelimit të ushtrisë së Kosovës, por gjithashtu ai ka shtuar se Greqia shikon pozitivisht çdo marrëveshje të sinqertë mes Prishtinës dhe Beogradit, që do do ndihmojë në stabilitetin e rajonigt, shkruan Top Channel.

“Njëkohësisht dërgoj një mesazh kritik ndaj këtyre akteve nga ana e Kosovës, të cilat i hedhin zjarrit benzinë, por në të njëjtën kohë çoj një mesazh që qeveria serbe të vazhdoje këtë rrugë të vështirë të gjendjes së një zgjidhjeje, sepse kjo është dhe rruga e perspektives se stabilitetit dhe rruga europiane e Serbisë që kaq shumë është përpjekur bashkë me popullin serb në rajonin ballkanik”, tha kryeministri grek.

Tsipras që qëndron në Beograd për të marrë pjesë në samitin e së shtunës bashkë me homologët e Bullgarisë dhe Rumanisë, i është referuar marrëveshjes së Prespës, e cila do ta shndërrojë sipas tij ish-Republikën Jugosllave të Maqedonisë nga një zonë gri mes Serbisë dhe Greqisë në një urë lidhëse midis dy vendeve.

Në takimin e katër liderëve ballkanikë një prej çështjeve në tryezën e bisedimeve është kandidimi për organizimin e Kupës së Botës në futboll në këto vende në vitin 2030.

Fjalë Kryesore:

Të ngjashme