Turistët do të paguajnë 2 euro për ta vizituar Shatërvanin Trevi

Turistët do të duhet të paguajnë dy euro nga shkurti për të hyrë dhe për të parë nga afër atraksionin turistik të Romës, Shatërvanin Trevi, i cili do t’i sjellë qytetit 6.5 milionë euro në vit, njoftoi sot kryebashkiaku i Romës, Roberto Gualtieri.

Hyrja falas në këtë kryevepër baroke do të vazhdojë të jetë e disponueshme vetëm për banorët e kryeqytetit italian. Shatërvani do të jetë ende i dukshëm nga larg, por qasja nga afër do të rezervohet ekskluzivisht për ata që kanë biletë, shpjegoi kryebashkiaku në një konferencë për shtyp.

“Nga 1 shkurti, po vendosim tarifa hyrjeje për gjashtë vende romake”, përfshirë Shatërvanin Trevi, tha ai. Hyrja në pesë vendet e tjera do të kushtojë pesë euro.

Shatërvani vizitohet nga mesatarisht 30,000 njerëz çdo ditë.

Shatërvani është një nga atraksionet turistike më të njohura në Romë. U bë i famshëm nga filmi i Federico Fellinit “La Dolce Vita”, në të cilin Anita Ekberg fton Marcello Mastroianni-n të bashkohet me të në shatërvan në skenën ikonike. Një vizitë në Shatërvanin Trevi është në krye të listës së gjërave për të parë për shumë vizitorë që eksplorojnë Qytetin e Përjetshëm, shkruan Klan Kosova.

Të shprehësh një dëshirë dhe të hedhësh një monedhë në pellgun e shatërvanit është një traditë nga e cila përfitojnë edhe autoritetet e qytetit. Çdo javë, ata mbledhin atje mijëra euro në monedha, të cilat më pas i dhurohen Caritas-it.