Ushtruesi i Detyrës së Kryeprokurorit të Shtetit Besim Kelmendi ka marrë pjesë në takimin e përbashkët të Udhëheqësit të Zyrës për Rikthim të Aseteve – Prokurorit të Zyrës së Kryeprokurorit të Shtetit Bahri Hyseni, me zyrtarët e deleguar nga institucionet ligj zbatuese në këtë zyrë, raporton Ekonomia Online.

Në këtë takim morën pjesë edhe partnerët ndërkombëtar që e mbështesin punën e kësaj zyreje që nga themelimi i saj. 

Gjatë këtij takimi u diskutua raporti vjetor i punës për vitin 2024, si dhe planifikimi i punës për vitin 2025 dhe sfidat me të cilat ballafaqohet Zyra për Rikthim të Aseteve.

Me këtë rast Ushtruesi i Detyrës së Kryeprokurorit të Shtetit, duke vlerësuar lartë punën që ka bërë Zyra për Rikthim të Aseteve që nga funksionalizimi i saj, ofroi përkrahjen dhe mbështetjen e tij për këtë Zyrë me qëllim për të arritur sukseset e përbashkëta të Zyrës për Rikthim të Aseteve.

Gjithashtu edhe në këtë takim Ushtruesi i Detyrës së Kryeprokurorit të Shtetit, z. Besim Kelmendi, falënderoi  partnerët ndërkombëtarë për mbështetjen dhe ndihmën e dhënë në forma të ndryshme për themelimin dhe funksionalizimin e Zyrës së Rikthimit të Aseteve dhe shprehu gatishmërinë e tij për vazhdim të bashkëpunimit me të gjitha institucionet tjera ligj-zbatuese me qëllim të funksionimit sa më të mirë të kësaj Zyreje.