Një ushtar i Rusisë i ka vrarë katër kolegë të tij në një bazë në Çeçeni, para se ai ishte qëlluar për vdekje, ka njoftuar Garda Kombëtare.

Ushtari dje kishte hapur zjarr në kazermën afër fshatit Shelkovskaja në Çeçeni, që është rajon i Rusisë me popullatë shumicë myslimane, ka raportuar agjencia e lajmeve Interfax, duke e cituar Gardën Kombëtare.

Për këtë incident kanë filluar hetimet.

Presidenti i Rusisë, Vladimir Putin, vitin e kaluar e ka formuar Gardën Kombëtare dhe ajo i përgjigjet direkt Putinit. Forca e sigurisë së Gardës Kombëtare e ka për detyrë luftimin e terrorizmit, krimit të organizuar dhe mbajtjen e rendit.

Raportohet se sulmet e armatosura kundër autoriteteve dhe forcave të sigurisë në rajonin e Çeçenisë dhe më gjërë në Kaukazin rus janë të shpeshta.