Shefi i Thesarit të Vatikanit, kardinali australian, George Pell, i cili u shpall fajtor për abuzime të shumta seksuale me fëmijët, ka hedhur poshtë këto akuza para shtypit para se të njoftonte qëllimin për t’u rikthyer në vendin e tij për t’u përballur me drejtësinë.

“Jam i pafajshëm, këto akuza janë të rreme”, theksoi Pell në një deklaratë të shkurtër për shtyp në Vatikan duke njoftuar se do të merrte një leje të përkohshme nga Vatikani për t’u vetëmbrojtur.

Selia e Shenjtë pranoi nga ana e saj “lejen” për numrin tre të Vatikanit, pa kërkuar dorëheqjen e tij, në një komunikatë duke përshëndetur cilësitë e kardinalit të ngarkuar që prej tre vitesh me menaxhimin e çështjeve ekonomike brenda papatit.

Përfaqësuesi më i lartë i Kishës Katolike në Australi, kardinali, 76 vjeç, i cili mban postin e ministrit të Ekonomisë në Vatikan ka qenë për dy dekada me radhë një prej figurave më të rëndësishme të Kishës Katolike në debatin mbi çështje polemizuese siç është ajo e homoseksualitetit.

“Policia e shtetit të Viktorias shpalli fajtor George Pell për abuzime seksuale”, deklaroi për shtypin zëvendëskomisari Shane Patton.

Pell u thirr sipas Patton më 18 korrik para gjykatës së instancës së parë të Melburnit, në juglindje të Australisë, për t’u marrë në pyetje.