Sulmet me dronë dhe raketa ruse në Ukrainë kanë vrarë 10 persona dhe kanë plagosur të paktën 76 të tjerë gjatë ditës së kaluar.

Zyrtarët në pesë rajone anembanë vendit raportuan viktima, ndërsa Moska vazhdon të shënjestrojë qytetet ukrainase me sulme të rregullta ajrore.

Ndërkohë, Presidenti ukrainas Volodymyr Zelensky tha se një terminal nafte në veriperëndim të Rusisë ishte dëmtuar ndjeshëm, ndërsa dy anije cisternë ruse u goditën pranë portit rus të Detit të Zi, Novorossiysk, shkruan BBC, transmeton Klankosova.tv.

Nuk ka detaje mbi dëmet e shkaktuara ndaj anijeve, por Zelensky tha se anijet ishin pjesë e “flotës në hije” të Rusisë, e përdorur për të shmangur sanksionet perëndimore.

Ushtria ukrainase tha se një raketë balistike dhe gati 270 dronë u qëlluan nga Rusia, por shumica u interceptuan.

Tre persona u vranë në incidente të ndara në rajonin e Khersonit, tha guvernatori, ndërsa nga dy vdiqën në secilin prej rajoneve të Odesës, Donetskut dhe Zaporizhzhisë dhe nga një në rajonin e Sumit.

Në të njëjtën kohë, Rusia tha se Ukraina kishte qëlluar të paktën 334 dronë, me rajonin veriperëndimor të Leningradit në shënjestër të madhe.