Në vazhdën e përmirësimit të rrjetit të ujësjellësit në rrugën “Ismet Sopa” që shtrihet për gjatë vijës hekurudhore në drejtim të Shtimes, kompania Rajonale për Ujë dhe Kanalizim ”Bifurkacioni”, ka vazhduar të shtunën me shtrirjen e gypit të ujësjellësit me një gjatësi prej 1.1 km.

Punimet në këtë projekt nga afër i ka përcjellë edhe kryetari i Ferizajt, Muharrem Svarqa, ndërsa me këtë rast drejtori ekzekutiv i KRUK ”Bifurkacioni”, Nazif Asllani, ka thënë se në këtë aks rrugor komuna është duke i kryer punimet në asfaltimin e kësaj rruge, ndërsa kompania po merret me shtrirjen e gypit të ujit me një gjatësi prej 1.1 km.

“Punët jemi duke i kryer ne, në bashkëpunim me komunën dhe CDI-në.Kjo lagje ka pasur furnizim me ujë, por banorët ujin e marrin prej rrjeteve të ndryshme.Meqë është e nevojshme, pasi po shtrohet rruga, të futet një gyp i ri. Ne jemi duke i kryer punimet dhe se me këtë do t’i eliminojmë të gjitha kyçjet ilegale dhe rrjedhat, kështu që kjo lagje e zgjidh përfundimisht problemin e ujit të pijes”, ka thënë Asllani.

Ndryshe, ky projekt i rregullimit të rrugës po mendohet se do ta zgjidhë problemin e qarkullimit të banorëve të pjesës veriperëndimore të komunës